Muri iri gororero rya Gicumbi ,bashima ubuyobozi bw’igihugu bukomeza kubegera ngo bubafashe gukurikiza amabwiriza azaborohereza gusubira mu buzima busanzwe ,bakajya kubaka ingo n’ imiryango bakomokamo.

Babigarutseho kuri uyu wa 26 Mutarama 2026 mu bukanguranbaga bwo kuburanisha Imanza nsanasano hagamijwe gufasha abagororwa kwihutisha imanza zabo, no kugabanya umubare wabari mu magororero bitewe n’ibyiciro by’ibyaha bakoze.

Igororero rya Gicumbi ribarizwamo Imfungwa n’abagororwa bagera ku bihumbi 2926, bakurikiranweho ibyaha ariko basabwa kwemera gusaba imbabazi bikazabafasha gutuma basubira kubaka imiryango bakomokamo mu gihe gito.

Andi mahirwe abagororwa basobanuriwe n’uko uwemeye icyaha akemera kwiyunga n’uwo yagikoreye akumusaba imbabazi bizajya bituma babana neza nta kwishishanya.

Perezida w’urukiko rukuru Habarurema Jean Pierre avuga ko bizafasha kugabanya umubare w’abagororwa bari mu magororero atandukanye, ariko hakabaho no kunga abaturage bikazatuma basubira mu buzima busanzwe badafitanye amakimbirane.

Umuyobozi wa Gereza ya Gicumbi asaba abagororwa kurushaho guhindura imyumvire,bagakoresha ukuri no gucika ku myitwarire yatuma bongera gusubira mu bihano.

Umushinjacyaha uyobora ubushinjacyaha ku rwego rwisumbuye rwa Gicumbi Batamuriza Alice avuga ko iyo umuntu atanze amakuru yose ajyanye n’ikurikiranacyaha ahabwa amahirwe yo kuburanishwa vuba, ndetse hakabaho kumvikana n’ubushinjacyaha akaburana ari mu igororero cyangwa akemererwa gukurikiranwa ari hanze y’igororero.

Ati:” Ni gahunda nziza ihuza uwakoze icyaha n’uwagikorewe, akenshi iyo bahuye bagasabana imbabazi hari ibyo bumvikana, ndetse ko kuburanisha izi manza hagamijwe gukangurira abataragezweho n’aya mahirwe kuba bakwitabira imiburanire yo muri ubu buryo, kwegera ababishinzwe bakabafasha kuburanishwa”.

Igororero rya Gicumbi ribarizwamo urubyiruko rugera kuri 40,6%, rukaba rusabwa kubyaza inyungu ayo mahirwe begerejwe, kugira ngo bahabwe ubutabera bunoze no gusubira mu buzima busanzwe bakubaka igihugu n’imiryango bakomokamo.

Uhagarariye Abagororwa i Gicumbi (Doyen) avuga ko imfungwa n’abagororwa bari mu Miyove batekanye kandi bameze neza mu gihe bagitegereje guhabwa ubutabera, gusa ko nubwo bari mu igororero bagezwaho ibintu byose bigenwa n’amategeko haba kugaburirwa cyangwa koroherezwa kujya guhabwa ubutabera .

Ati:” Igihugu kiba cyatekereje gufasha abantu akaba ariyo mpamvu abarebwa n’izi manza batakwitesha amahirwe”.

Umuyobozi w’Akarere ka Gicumbi Nzabonimpa Emmanuel yasobanuriye abagororwa ko ubuyobozi bw’igihugu buzirikana ku muturage uwari we wese, niyo yaba akurikiranyweho icyaha ndetse hagatekerezwa n’uburyo bafashwa guhinduka bagasubira kubaka imiryango izira ibyaha.

Abagororerwa i Gicumbi bashima ko iyo bakigerayo bose bahabwa ubwisungane mu kwivuza n’abaganga bo kubitaho bigizwemo uruhare n’ubuyobozi bw’iri gororero, iyo basubiye iwabo bahabwa amafaranga y’urugendo ku buntu (Ticket), ndetse bagafashwa kujya guhabwa serivisi z’ubutabera, no kwigishwa imyuga ibafasha kuzibeshaho mu buzima bwo hanze.

Abagororerwa mu igororero rya Gicumbi biyemeje gusaba imbabazi

Mu igororero rya Gicumbi harimo abaganga ndetse n’abacunga umutekano wabo

Kwemera icyaha no gusaba imbabazi bizafasha kugabanya ubucucike

Yanditswe na nkurunziza Bonaventure