Kivu y’Epfo: Bidasubirwaho AFC/M23 yemeje ko yigaruriye Umujyi wa Uvira
Ingabo za AFC/M23 zirwanya ubutegetsi bwa Repubulika Iharanira Demokarasi ya Congo, zaraye zinjiye mu Mujyi wa Uvira ku mugoroba wo ku wa Kabiri, Tariki 09 Ukuboza nta mirwano ihambaye ibayeho.
Umuvugizi wa AFC/M23, Lawrence Kanyuka, abinyujije ku rukuta rwe rwa X yatangaje ko bidasubirwaho Umujyi wa Uvira uri mu biganza bya AFC/M23.
Nkuko Kanyuka akomeza abitangaza, avuga ko hari hashize amezi asaga atatu Ubutegetsi bwa Leta ya Kinshasa ku bufatanye n’Ingabo z’u Burundi bahohotera abaturage b’inzirakarengane bo muri Kivu y’Amajyepfo.
Avuga ko AFC/M23 yafashe icyemezo cyo kuza kugobotora abaturage Ubutegetsi bwa Kinshasa, nk’uko babikoze mu bindi bice bagenzura birimo Goma na Bukavu.
AFC/M23 ivuga ko itazihanganira kubona abavandimwe babo bicwa bazira ubusa. Yaboneyeho no gusaba Abanyekongo bari mu mahanga, gutaha mu gihugu cyabo kuko umutekano ugenda ugarurwa mu bice bitandukanye.
Urugamba rwo kubohora Umujyi wa Uvira uherereye muri Kivu y’Amajyepfo, rwarangiye AFC/M23 yongeye gukubita inshuro Ihuriro ry’Ingabo zirwana ku ruhande rwa Leta ya Kinshasa rigizwe na FARDC, Wazalendo, FDLR n’Abasirikare b’Abarundi.
Uru rugamba rwo kubohora uyu Mujyi wa Kabiri muri Kivu y’Amajyepfo, rwatwaye Abarwanyi ba AFC/M23 iminsi icyenda gusa.
Yanditswe na Nkurunziza Bonaventure
