Imiryango yatujwe mu Mudugudu wa Nyirakayobe yahoze ituriye icyuzi cya Muyanza, amashanyarazi yari isanzwe ifite yaburaga kenshi, hari n’ababuraga ubushobozi bwo kuyishyura.

Umuriro uturuka ku mirasire y’izuba uri guhabwa aba baturage ukusanyirizwa muri “Living Lab”, ifasha abanyeshuri ba RP Tumba kwiga neza no gutanga ibisubizo ku baturiye iri shuri.

Umuyobozi Mukuru wa RP Tumba College, Eng. Mutabazi Ritha Clemance, avuga ko iki gikorwa kigamije gufasha abaturage no kugabanya ibyanduza ikirere.

Ati:” Iyi Hab ifasha abanyeshuri gushyira mu bikorwa ibyo biga, kuko intego atari ugutsindira amanota gusa, ahubwo ari ukwiga ibitanga ibisubizo muri rubanda. Turasaba abaturage gufata neza uyu muriro no kuwubyaza umusaruro.”

Bamwe mu baturage bahawe uwo umuriro ukomoka ku mirasire y’izuba bavuga ko bizabafasha mu iterambere ryabo, kuko amafaranga baguraga umuriro usanzwe bagiye kujya bayazigama.

Ashimwe Raissa ati: ” Iterambere ryacu rigiye kwiyongera kuko tugiye kuzigama ayo twatangaga ku muriro, kandi impungenge zo kuwubura zirashize.”

Umunyamabanga Nshingwabikorwa w’Akarere ka Rulindo, Nshimiyimana Dieudonnée, yashimiye RP Tumba avuga ko ibi biri mu mihigo yo kongerera abaturage amashanyarazi nk’uko biteganywa na gahunda ya Leta.

Ati:“Ikindi cyiza, biri gukorwa n’abana bacu bagacanira abaturage kandi bari no gukarishya ubumenyi bwabo. Natwe nk’Akarere tuzakomeza kongerera abaturage amashanyarazi.”

Sitasiyo y’amashanyarazi yo mu Mudugudu wa Nyirakayobe, yubatswe na RP Tumba College n’abafatanyabikorwa barimo GREATER ku nkunga ya Erasmus+, izafasha abanyeshuri kwiga no kugeza ku mashanyarazi abaturage.