Umuturanyi wabo, yabwiye Imvaho Nshya ko inkoko y’uyu Burindwi Samuel yagiye konera uwitwa Nyiracumi Vianney, arayifata maze uyu mugabo aza kuyimwaka afite umuhoro aho kmusaba imbabazi , amubwira ko natayimuha amwica.

Yagize ati: ”Batonganye, Burindwi amukubita umupanga mu bitugu aramukomeretsa bikomeye, anamuruma umunwa wo hejuru.”

Yakomeje agira ati “Abaturage bari baje gutabara babonye amutema gutyo, bagira ubwoba barahunga. Mushiki wa Nyiracumi witwa Nyiramyasiro Meliane abona musaza we ashobora kwicwa n’uwo mugabo, aramusimbukira amufata amuturutse inyuma, akiza musaza we.”

Burindwi ngo yahise amuhindukirana na we amutema ikiganza amukomeretsa urutoki rw’igikumwe, abaturage babonye ashobora kubica bombi, baramufata bamwaka uwo muhoro ndetse bahita banahamagara  Polisi iramutwara.

Aba baturage babiri bakomerekejwe n’uyu mugabo bahise bajyanwa ku Kigo Nderabuzima cya Bweyeye, bagejejweyo, uwo musore we basanga yakomerekejwe cyane ahita ajyanwa Ku bitaro bya Gihundwe.

Undi muturanyi w’aba bantu bakomerekejwe, yavuze ko uwo mugabo asanzwe ari igihazi, n’urugomo rwe atari urwa mbere kubera ko yigeze gukubita mushiki we bavukana aramwangiza cyane na we ajyanwa igitaraganya mu bitaro bya Gihundwe.

Ati: “Yakubise mushiki we amuziza ko yamufatiye telefoni akayivugiraho umuriro akawumaramo, akabura ahandi acomekera kuko nta mashanyarazi ahari mu gace babamo. Basanze yamwangije, ajyanwa mu bitaro bya Gihundwe. Asanganywe imyitwarire mibi rwose, akosowe byadufasha twese.”

Umunyamabanga Nshingwabikorwa w’Umurenge wa Bweyeye, Rwango Jean de Dieu, yavuze ko nta kindi ubuyobozi bwari gukora uretse kumushyikiriza inzego z’umutekano.

Yagize ati: “Arimo arabibazwa muri RIB kuko aho kugira urugomo nk’urwo yagombaga kujyana ikibazo cye mu buyobozi bukagikemura aho gukomeretsa abantu kuriya.”

Yongeyeho ati: “Asanganywe imyitwarire mibi. Yagiriwe inama kenshi tugira ngo yarakosotse, ariko biragaragara ko atakosotse akeneye gukomeza kwigishwa.”

Yaboneyeho gusaba abaturage kwirinda urugomo no gushaka kwihanira.