U Butaliyani bwafashe intwaro karabutaka zivuye mu Burusiya zari zohererejwe umujenerali wo mu gihugu cya Libya
U Butaliyani bwafashe intwaro karabutaka zivuye mu Burusiya zari zohererejwe umujenerali wo mu gihugu cya Libya
Abategetsi b’Abataliyani bafashe ubwato bw’imizigo bivugwa ko bwari butwaye intwaro zivuye mu Burusiya ku muyobozi w’ingabo zirwanya guverinoma yemewe n’amahanga muri Libya, Gen. Haftar .
Ku wa Gatanu, ikinyamakuru Corriere della Sera cyo mu Butaliyani cyatangaje ko abashinzwe umutekano bakoze iki gikorwa babisabwe n’abayobozi ba Leta Zunze Ubumwe za Amerika kandi bafata intwaro zifite agaciro k’amamiliyoni y’amadolari bivugwa ko zerekezaga i Benghazi muri Libya.
Ikinyamakuru kivuga ko Amerika yatanze amakuru ajyanye n’ubwato bw’imizigo igenewe ingabo z’umuyobozi w’intambara ushyigikiwe n’u Burusiya, Gen. Khalifa Haftar, uyobora iburasirazuba n’ibice byo mu majyepfo ya Libya.
Abashinzwe ubutasi muri Amerika bakeka ko Kremlin ishaka kubaka icyambu cyayo cya gisirikare i Tobruk, hagenzurwa na Haftar muri Libya.
Kohereza ibikoresho bya gisirikare muri Libya binyuranyije n’ibihano bya Loni.
Ikinyamakuru gikomeye cyo mu Butaliyani cyatangaje ko ubwato bunini bw’ubucuruzi MSC Arina bwavuye mu Bushinwa ku ya 30 Mata. Abayobozi ba Amerika bahisemo gufata izo ntwaro basaba ubufasha u Butaliyani bukigera ku cyambu cya Gioia Tauro.
Icyakora, iki kinyamakuru kivugana n’isosiyete itwara ibicuruzwa, MSC, yavuze ko itazi ibya kontineri yafashwe.
Ibikoresho bya gisirikare byafashwe ntibirasobanuka neza, ariko bamwe mu basesenguzi bavuga ko bishobora kuba birimo indege zidatwarwa n’abapilote zizwi nka drones.
Ku wa gatanu, umuvugizi wa Minisiteri y’ububanyi n’amahanga ya Amerika, Matthew Miller, yatangaje ko ahangayikishijwe n’ubutumwa bw’amato bw’u Burusiya butanga ibikoresho bya gisirikare muri Libya.
