Ikipe y’Igihugu y’u Rwanda yo gusiganwa ku magare yamaze gufata urugendo ruyerekeza mu gihugu cya Algérie, aho igiye guhatana mu isiganwa rya Tour d’Algérie 2026 ritegerejwe n’amakipe atandukanye ku rwego mpuzamahanga.

Ku mugoroba wo ku wa 14 Mata 2026, mbere yo guhaguruka, habaye umuhango wo gusezera kuri iyi kipe, ihabwa ibendera ry’igihugu nk’ikimenyetso cy’inshingano zo guhagararira u Rwanda. Uyu muhango witabiriwe n’abayobozi ba FERWACY barimo Umunyamabanga Mukuru Ruyonza Arlette n’Umuyobozi Nshingwabikorwa Mugabe David, bashimangiye icyizere bafitiye abakinnyi.

Umutoza mukuru Sempoma Félix yatoranyije abakinnyi batandatu bagomba guhagararira igihugu muri iri rushanwa. Abo ni:

1. Masengesho Vainque
2. Ufitimana Shadrack
3. Uhiriwe Espoir
4. Twagirayezu Didier
5. Nshutiraguma Kevin
6. Ntirenganya Moïse

Mu mateka aheruka, Masengesho Vainqueur ni umwe mu bagaragaje urwego rwiza, kuko mu 2024 yasoje iri siganwa ari mu bakinnyi icumi ba mbere ku rutonde rusange, ibintu byongereye icyizere ku mikorere y’iyi kipe.

Iri rushanwa riteganyijwe kuva ku wa 17 kugeza ku wa 26 Mata 2026, rizahuza amakipe agera kuri 20 aturuka mu bihugu bitandukanye, harimo ayo ku mugabane w’u Burayi n’uwa Afurika. Mu bazaryitabira harimo:

1. Tarteletto-Isorex,
2. Cyklotym Havířov-Tirana,
3. Embrace the World CT,
4. Energus Cycling Team,
5. Tshenologo Pro Cycling Team

Hakiyongeraho amakipe y’ibihugu nka Tunisia na Oman.

Ku ruhande rw’u Rwanda, kwitabira iri siganwa ni uburyo bwo gukomeza kwigaragaza ku rwego mpuzamahanga no kongera ubunararibonye ku bakinnyi, mu gihe igihugu gikomeje guteza imbere umukino wo gusiganwa ku magare.