Igipolisi mu Karere ka Tororo, mu burasirazuba bwa Uganda cyatangiye iperereza ku irasana ry’abapolisi babiri barasaniye mu kabari umuto akarasa umukuriye akahasiga ubuzima.
Umuvugizi wa polisi muri Bukedi y’amajyepfo, IP Moses Mugwe, yavuze ko Inspector of Police (IP) Moses Okwele na Assistant Inspector of Police (AIP) William Ochom barasanye nyuma yo gutongana bapfa umuseriveri wo mu kabari ko muri Petta, mu Karere ka Tororo kuwa 31 Mutarama saa tatu z’ijoro.
Yavuze ko abapolisi bombi bari boherejwe gukorera kuri polisi ya Petta mbere yo kurasana nk’uko iyi nkuru dukesha Daily Monitor ikomeza ivuga.
Abatangabuhamya babwiye polisi ko nyuma yo gutongana, IP Okwele yasohotse mu kabari bucece akagaruka nyuma y’iminota micye yitwaje imbunda ya SMG. Yahise arasa akomeretsa AIP Ochom wahise amusubiza ahita amwica.
IP Okwele yishwe n’ibikomere by’amasasu yarashwe mu nda mu gihe AIP Ochom yihutanwe ku Bitaro Bikuru bya Tororo, aho akomeje gukurikiranirwa n’abaganga ku bikomere yagize ku maguru. Ubwo hakorwaga raporo, AIP Okwele yari agiye kwimurirwa ku Bitaro bya Mbale, mu gihe umurambo wa Okwele wari ukiri mu buruhukiro.
Umuvugizi wa polisi ati “Birababaje kuba twabuze umupolisi ariko twatangiye iperereza ngo tumenye neza impamvu yo kurasana. Turasenga ngo umupolisi warashe akica mugenzi we arokoke ngo adufashe kumenya impamvu batonganaga
