Asaga Miliyari 1.43 zigiye gushorwa mu bikorwaremezo biteza imbere ubuhinzi n’ubworozi
Asaga Miliyari 1.43 zigiye gushorwa mu bikorwaremezo biteza imbere ubuhinzi n’ubworozi
Minisiteri y’Ubuhinzi n’Ubworozi na Banki Nyafurika Itsura Amajyambere (AfDB) zasinye ku nyandiko ziganisha ku nyigo y’ishyirwa mu bikorwa ry’icyiciro cya kabiri cy’umushinga wa Gabiro Agri Business Hub ukorerwaho ibikorwa by’ubuhinzi n’ubworozi.
Uyu mushinga ufite ubuso bwa hegitari ibihumbi 16, harimo hegitari 5,600 zakoreweho icyiciro cya mbere. Intego y’ubu bufatanye ni ugusuzuma uburyo hashyirwaho agace kihariye kagenewe inganda zongerera agaciro umusaruro ukomoka ku buhinzi n’ubworozi, ububiko bukonjesha, ibigo byo guhuriza hamwe umusaruro n’ibindi bikorwaremezo bifasha abahinzi bato.
Inyandiko yashyizweho umukono kuri uyu wa Kabiri ateganya inkunga ya AfDB ingana na $995,000 (asaga miliyari 1.43 z’amafaranga y’u Rwanda). Aya mafaranga azifashishwa mu gukora inyigo ku bushobozi, gusuzuma ingaruka ku bidukikije n’imibereho y’abaturage, ndetse kongerera imbaraga gahunda yo kongerera agaciro umusaruro ukomoka ku buhinzi n’ubworozi ndetse no kugabanya igihombo abahinzi bahura nacyo nyuma y’isarura.
Uyu mushinga uteganyijwe kuzamura urwego rw’ubuhinzi n’ubworozi mu Rwanda, kugabanya igihombo giterwa no kwangirika k’umusaruro nyuma yo gusarura abahinzi benshi bakunze guhura nacyo ndetse no gufasha abahinzi bato kubona ibikorwaremezo n’isoko bihamye, bityo bigafasha igihugu kugera ku ntego z’iterambere rirambye.
