Bill Ruzima uri mu bahanzi bagezweho muri iyi minsi akavugwaho ubuhanga mu kuririmba, yatawe muri yombi n’Urwego rw’Igihugu rw’Ubugenzacyaha, RIB, akurikiranyweho kunywa no gutunda ibiyobyabwenge.
Ni amakuru yahamijwe n’Umuvugizi wa RIB, Dr. Murangira B.Thierry, wavuze ko Bill Ruzima yatawe muri yombi ku wa 15 Ugushyingo 2025.
Ati “Yego ni byo yatawe muri yombi ku wa 15 Ugushyingo 2025, arakekwaho ibyaha byo kunywa no gutunda ibiyobyabwenge biri mu bwoko bw’urumogi.”
Amakuru yizewe ahari ni uko Bill Ruzima yatawe muri yombi afatiwe mu Murenge wa Kimihurura akaba acumbikiwe kuri sitasiyo ya RIB ya Kimihurura.
Nubwo akurikiranyweho ibyaha byo kunywa no gutunda ibiyobyabwenge biri mu bwoko bw’urumogi ndetse akaba yemera ko yanywaga urumogi kuva mu 2022, Bill Ruzima ni umwe mu bahanzi bafite izina rimaze kumenyekana mu muziki w’u Rwanda by’umwihariko agakundirwa ijwi rye n’uburyo ari umuhanga mu kwandika.
Mu minsi ishize yari yagiye kwiga mu Budage birangira atashye mu Rwanda nyuma y’imyaka itari mike ari gukurikirana amasomo, aza no gukora igitaramo yaherewemo ikaze muri Nyakanga 2025.
Uyu muhanzi wamaze gutabwa muri yombi azwi cyane mu ndirimbo nka Imana y’abakundana, Munda y’Isi n’izindi zikomeye.
Iki cyaha cyo gutunda no gucuruza ibiyobyabwenge gihanishwa igihano cy’igifungo cya burundu n’ihazabu y’amafaranga atari munsi ya miliyoni 20 Frw ariko atarenga miliyoni 30 Frw, nk’uko biteganyijwe mu ngingo ya 11 y’ Itegeko nimero 69/2019 ryo ku wa 08 Ugushyingo 2019 rihindura itegeko nimero 68/2018 ryo ku wa 30 Kanama 2018 riteganya ibyaha n’ibihano muri rusange.
