MUHIZI Anatole wareze BNR kuri Perezida Paul Kagame yahanaguweho ibyaha
Urukiko rukuru urugereko rwa Nyanza rwagize umwere Anatole Muhizi na Me Emile Katisiga mu rubanza rwavuzwe cyane ku rwego rw’igihugu, rwari rushingiye ku uburiganya n’inyandiko mpimbano mu igurishwa ry’inzu yari yaratanzweho ingwate n’umukozi wa Banki Nkuru y’u Rwanda (BNR).
Muhizi wari umaze imyaka 3 aburana afunzwe, yamenyekanye cyane ubwo yajyaga gutangira ikirego cye imbere ya Perezida Paul Kagame mu ruzinduko rwari rugamije kwegera abaturage mu karere ka Nyamasheke mu 2022. Yashinjaga BNR n’Ikigo cy’Igihugu Gishinzwe Imicungire n’Imikoreshereze y’Ubutaka (RLMUA) gukorana mu buryo bunyuranyije n’amategeko byamuviriyemo gutakaza inzu yavugaga ko yayiguze mu buryo bwemewe n’amategeko.
Icyemezo gishya cy’Urukiko Rukuru, cyasomwe ku wa 24 Nyakanga 2025, cyatesheje agaciro icyemezo cy’Urukiko Rwisumbuye rwa Muhanga cyo mu 2023, cyari cyahamije abo bombi ibyaha birimo:
· Kubona inyungu bwite binyuze mu buriganya,
· Gukoresha inyandiko za Leta mu buryo butemewe n’amategeko,
· No kuyobya inkiko mu bushake.
Amavu n’amavuko y’uru rubanza
Nyuma y’uko Muhizi atangarije ikibazo cye Perezida wa Repubulika, Perezida Kagame yahise ategeka Minisitiri w’Ubutegetsi bw’Igihugu icyo gihe, Jean Marie Vianney Gatabazi, na Komiseri Mukuru wungirije wa Polisi, Felix Namuhoranye, gukurikirana iki kibazo.
Iperereza ryakurikiyeho ryakozwe n’Urwego rw’Igihugu rushinzwe Ubugenzacyaha (RIB) n’Ubushinjacyaha Bukuru (NPPA), ryerekanye isura itandukanye n’iyatangajwe na Muhizi.
Muhizi yashinjwaga kurenga ku byemezo by’inkiko inshuro nyinshi, gukoresha inyandiko mpimbano no kwambura inzu yari yatejwe cyamunara na BNR nyuma y’uko nyirayo wambere, Jean Léon Rutagengwa, ananiwe kwishyura inguzanyo ya miliyoni 31 FRW.
Ibimenyetso byaje kugaragaza ko Rutagengwa yari yaragurishije iyo nzu ku bantu babiri batandukanye. ku bwa mbere kuri Patrick Benerugaba, hanyuma no kuri Muhizi nubwo yari yaramaze kuyitanga nk’ingwate.
Muhizi yari yarareze BNR, Ikigo cy’Ubutaka ndetse n’umuhesha w’inkiko, ariko atsindwa izo manza zose.
Nk’uko byemejwe n’Umuvunyi Mukuru, Madeleine Nirere, Muhizi yari yaranyuze mu nzira zose z’ubutabera ariko nta n’imwe yari yaramurenganuye.
Icyo gihe kandi, Alphonsine Nibigira, umugore wa Rutagengwa, nawe yitabaje inkiko asaba ko igurishwa ry’iyo nzu rihagarikwa kuko atari yabajijwe. Ariko nabyo byateshejwe agaciro n’inkiko.
Iperereza ryakomeje risanga inzu yari yaragiye mu maboko y’abatanga inguzanyo mu buryo butemewe n’amategeko, aho Muhizi yashinjwaga kugerageza kwishyura inguzanyo yananiwe kugaruza yitwaje ko ari nyiri inzu.
Muhizi na Katisiga bashinjwaga ibyaha bitandukanye birimo gukoresha inyandiko mpimbano no kuyobya inkiko. Muhizi yarafunzwe, naho Me Katisiga akurikiranwa adafunzwe.
Mu Ugushyingo 2023, bombi bahamijwe ibyaha n’Urukiko Rwisumbuye rwa Muhanga, bahanishwa igifungo cy’imyaka 5. Nyuma bahise bajuririra Urukiko Rukuru urugereko rwa Nyanza.
Impamvu Urukiko Rukuru rwagize Muhizi Anatole na Me Emile Katisiga abere
Urukiko Rukuru rwashingiye ku kubura ibimenyetso bifatika byemeza ko bashoboye guhamwa n’ibyaha. Rwashingiye ku myanzuro y’Urukiko rw’Ikirenga cyane cyane urubanza RPAA 0034/10/CS, rwemeje ko nta muntu ugomba guhamwa n’icyaha hatabayeho ibimenyetso birenze gushidikanya.
Mu isesengura ryarwo, Urukiko Rukuru rwagaragaje ko Ikigo cy’Indangamuntu (NIDA) cyari cyatanze icyangombwa kivuga ko Nibigira atashakanye, hashingiwe ku makuru yari mu bubiko bwacyo icyo gihe. Bityo, icyangombwa nticyashoboraga kwitwa impimbano.
Urukiko rwatesheje agaciro n’icyifuzo cy’Ubushinjacyaha cyashinjaga Muhizi ko yatanze icyangombwa ku bw’inabi kuko cyari cyakorewe kuri nimero ye ya telefone. Abacamanza bavuze ko nta bimenyetso byerekana ko Muhizi yari agambiriye inyungu cyangwa ko icyangombwa cyakoreshejwe mu buriganya.
Ku bijyanye na Me Katisiga, Urukiko rwavuze ko yakoraga akazi ke k’ubwunganizi mu mategeko, kandi ko atagomba gukurikiranwa ku nyandiko zatanzwe n’inzego zibifitiye ububasha. Rwanibukije ko abavoka bagira ubudahangarwa mu gihe bari mu murimo wabo, keretse habonetse ibimenyetso bigaragaza uburiganya.
Urukiko rwibukije ko mu manza zirebana n’inyandiko mpimbano, hagomba kubaho ubushake bwo gukora icyaha (intention frauduleuse). Nta bimenyetso byagaragaje ko Muhizi cyangwa Katisiga bagize ubushake bwo gukora icyaha cyangwa ko hari umuntu wagiriwe nabi.
Hashingiwe ku ngingo ya 185 y’Amategeko agenga imigendekere y’imanza z’inshinjabyaha, Urukiko Rukuru rwategetse ifungurwa ryihuse rya Muhizi, kuko nta mpamvu y’amategeko yari igihari yo kumufunga.
Urukiko rwashoje rwibutsa ko mu rubanza rw’inshinjabyaha, ugushidikanya uko ari ko kose kurengera uregwa, rugaragaza ihame ry’uko umuntu wese afatwa nk’umwere kugeza abihamijwe n’urukiko mu buryo budashidikanywaho.
