Kuri uyu wa Mbere tariki ya 13 Werurwe 2026 Nyirubutungane Papa LEO XIV aratangira uruzinduko rwa Gitumwa ku mugabane w'Africa , umugabane ubarizwaho 20% by'abakristu Gatolika ku isi yose.
Umushumba Mukuru wa Kiliziya Gatorika ku Isi Papa Leo XIV agiye gutangira urugendo rwe rwa mbere rw’intumwa (apostolic journey) muri Afurika. Ni urugendo rutangira kuri uyu wa Mbere, tariki ya 13 Mata 2026. Uru rugendo ruzamara iminsi 10, rukaba ari rwo rugendo rwa mbere rwe azaba akoreye kuri uyu mugabane wa Afurika kuva yatorerwa kuba Papa, aho azasura ibihugu birimo: Alijeriya, Kameruni, Angola, na Gineya Ekwatoriyale.
Biteganyijwe kuba urugendo rutoroshye mu ntangiriro z’ubupapa bwe, kuko ruzahuriza hamwe ingendo nyinshi, ibiganiro byo ku rwego rwo hejuru mu bya dipolomasi, ndetse n’ibirori bikomeye by’iyobokamana ku mugabane ndetse n’ahari ubwiyongere bw’umubare munini w’abayoboke b’idini Gatorika.
Kuri ubu bivugwa ako Afurika ituwemo n’Abagatolika bagera kuri miliyoni 288, bangana na 20.3% by’Abagatolika ku isi hose, nk’uko bigaragazwa n’Igitabo cy’umwaka cya Vatikani (2024). Bityo, uru ruzinduko rufatwa nk’urufite akamaro kanini mu rwego rw’ikimenyetso n’ingamba, rugaragaza ko ingufu za Kiliziya zigenda ziyongera mu bice by’isi biri mu majyepfo (Global South).
Papa Leo azaherekezwa n’abayobozi bakuru ba Vatikani barimo Karidinali Pietro Parolin, Karidinali Luis Antonio Tagle, na Karidinali Peter Turkson, hamwe n’itsinda rishinzwe dipolomasi n’itumanaho. Abanyamakuru bagera kuri 70 na bo bazamuherekeza muri uru rugendo.
Muri rusange, Papa azakora ingendo 12 z’indege ndetse n’izindi 4 za kajugujugu, anatange ibiganiro bitandukanye, inyigisho z’iyobokamana (homilies), n’ubutumwa mu ndimi zirimo Icyongereza, Igifaransa, Igiporutugali, n’Icyesipanyoli.
